ایچ بی ایل پی ایس ایل 11 میں پشاور   زلمی نے بابر اعظم کی سینچری کی بدولت کوئٹہ گلیڈی ایٹرز کو 118 رنز  سے  ہرادیا۔

کراچی میں کھیلے جا رہے میچ میں کوئٹہ گلیڈی ایٹرز نے  پشاور زلمی کے خلاف ٹاس جیت کر فیلڈنگ کا فیصلہ کیا۔

پشاور زلمی نے پہلے کھیلتے ہوئے مقررہ 20 اوورز میں 3 وکٹوں کے نقصان پر 255 رنز بنائے، یہ  پی ایس ایل کا تیسرا سب سے بڑا ٹوٹل ہے۔

پشاور  زلمی کی جانب سےکپتان  بابر اعظم نے اننگز کی آخری گیند  پر 2  رنز بناکر  ٹی ٹوئنٹی کی  اپنی بارہویں سنچری مکمل کی۔

بابرا عظم نے سنچری 52 گیندوں پر اسکور کی ، جس میں 6  چوکے اور 4  چھکے شامل تھے۔ان کے علاوہ  کوشال مینڈس نے 83 رنز کی اننگز کھیلی۔

 بابر اعظم ٹی ٹوئنٹی فارمیٹ میں ویرات کوہلی کی 47 شراکتوں کا ریکارڈ بھی برابر کرنے میں کامیاب ہوگئے، اُنہوں نے میچ میں کوشال مینڈس کے ساتھ دوسری وکٹ پر 135 رنز کی پارٹنرشپ قائم کی۔

کوئٹہ کی جانب سے عثمان طاق، ابرار احمد اور جوزف نے ایک ایک وکٹ لی۔

ہدف کے تعاقب میں کوئٹہ گلیڈی ایٹرز کے بیٹرز  وقفے وقفے سے  پویلین پہنچتے  ر ہے، ٹیم 19ویں اوور میں 137 رنز  بنا کر آؤٹ ہوگئی، بیون جیکبز نے 34 رنز کی قابل ذکر اننگز کھیلی۔

علی رضا اور محمد باسط نے تین، تین، ایرن ہارڈی نے دو کھلاڑیوں کو  آؤٹ کیا، اس فتح کے ساتھ پشاور زلمی کے 15 پوائنٹس ہوگئے ہیں، وہ ایونٹ میں اب تک ناقابل شکست بھی ہے۔