9 مئی کے احتجاجی مظاہروں اور توڑ پھوڑ کے واقعات پر شاہد آفریدی نے بالآخر خاموشی توڑ دی
پاکستان کرکٹ ٹیم کے سابق کپتان شاہد آفریدی نے 9 مئی کو پی ٹی آئی چیئرمین عمران خان کی گرفتاری کے بعد تحریک انصاف کے کارکنوں کی جانب سے ملک بھر میں کیے گئے احتجاجی مظاہروں اور توڑ پھوڑ کے واقعات پربالآخر خاموشی توڑ دی۔
9 مئی کو پاکستان تحریک انصاف کے چیئرمین عمران خان کی گرفتاری کے بعد پی ٹی آئی کارکنوں نے ملک کے مختلف شہروں میں احتجاج اور جلاؤ گھیراؤ کیا تھا۔
پی ٹی آئی کارکنوں نے جناح ہاؤس لاہور سمیت فوجی تنصیبات، تاریخی عمارتوں، سرکاری املاک اور گاڑیوں کو آگ لگا دی تھی اور پاک فوج نے 9 مئی کو یوم سیاہ قرار دیا۔
تاہم ان واقعات کو کئی دن گزرجانے کے بعد شاہد آفریدی نے احتجاجی مظاہروں پر کوئی بیان جاری نہ کرنے کی وجہ بتائی۔
نجی ٹی وی چینل کو انٹرویو دیتے ہوئے قومی کرکٹ ٹیم کے سابق کپتان شاہد آفریدی نے کہا کہ ‘بات یہ ہے کہ ہمارے یہاں مثبت چیز پر بھی کافی تنقید کی جاتی ہے، اختلاف رائے اچھی چیز ہے لیکن گالم گلوچ ، اخلاقیات سے اتر کر بدتمیزی کرنا، ایسی صورتحال میں انسان کہتا ہے کہ میں ان سب چیزوں سے سائیڈ میں ہی ہوجاؤں اور یہی وجہ کے میں نے اس حوالے سے کوئی بات نہیں کی’۔