ورلڈکپ : جنوبی افریقا نے بنگلادیش کو 149 رنز سے شکست دیکر چوتھی فتح حاصل کرلی
آئی سی سی ون ڈے ورلڈکپ میں جنوبی افریقا نے بنگلادیش کو 149 رنز کے بھاری مارجن سے شکست دے کر ایونٹ میں چوتھی کامیابی حاصل کرلی۔
جنوبی افریقا کے 383 رنز کے ہدف کے تعاقب میں بنگلادیش کی پوری ٹیم 46.4 اوورز میں 233 رنز پر آؤٹ ہوگئی۔ یہ بنگلادیش کی ایونٹ میں چوتھی ناکامی ہے۔
ممبئی کے وانکھیڈے اسٹیڈیم میں کھیلے گئے میچ میں جنوبی افریقا نے بنگلادیش کے خلاف ٹاس جیت کر پہلے بیٹنگ کا فیصلہ کیا۔
جنوبی افریقا نے مقررہ 50 اوورز میں 5 وکٹوں کے نقصان پر 382 رنز بنائے، ڈی کوک نے شاندار 174 رنز کی اننگز کھیلی۔
کوئنٹن ڈی کوک کی رواں ورلڈکپ میں یہ تیسری سنچری تھی۔
اس کے علاوہ ایڈن مارکرم نے 60 ، ہینڈرکس نے 12، وین ڈر ڈوسن نے ایک رن بنایا جبکہ ڈیوڈ ملر 34 رنز بناکر ناقابل شکست رہے۔
بنگلادیش کی جانب سے حسن محمود نے 2، مہیدی حسن میراز ، شریف الاسلام اور شکیب الحسن نے ایک ایک وکٹ حاصل کی۔
جنوبی افریقا کے 383 رنز کے ہدف کے تعاقب میں محمود اللہ نے 111 رنز کی اننگز کھیلی، لٹن داس 22 ، نسم احمد 19، حسن محمود 15، تنزید حسن 12، مہیدی حسن میراز نے 11 اور مشفیق الرحیم نے 8 رنز بنائے جبکہ مستفیض الرحمٰن 11 رنز بناکر آؤٹ ہوئے۔
پوری بنگلادیشی ٹیم 46.4 اوورز میں 233 رنز بناکر آؤٹ ہوگئی۔
جنوبی افریقا کی جانب سے گریلڈ کوزی نے 3 کھلاڑیوں کو آؤٹ کیا جبکہ مارکو یانسن ، لیزڈ ولیمز اور رباڈا نے 2 ،2 وکٹیں حاصل کیں۔
پوائنٹس ٹیبل
آئی سی سی ورلڈکپ کے گروپ اسٹیج کے پوائنٹس ٹیبل پر نظر ڈالیں تو بھارت پہلے ،جنوبی افریقا دوسرے، نیوزی لینڈ تیسرے اور آسٹریلیا چوتھے نمبر پر موجود ہے۔
بنگلادیش کا 5 میچز میں 4 میں شکست کے بعد آخری نمبر ہے۔